يلا كلنا نختم القرآن قبل رمضان ..

القران هو اللي خلاني اعرف ربنا .. وهو اكتر حاجة قربتني منه ..
وخلاني عرفت ربنا بجد .. وحسيت باجمل احساس في الكون
والله احساس مش ممكن يكون في احساس في الدنيا شبهه ...

لما كنت بحس اني لوحدي واقوم امسك المصحف واحس انه سبحانه وتعالى بيتكلم معايا ...
لما اصلي واحس اني بكلمه واحس اني مبسوطة قوي اني بسجد على الارض تحت عرشه سبحانه
لما اخاف من اي حاجة واقول يارب والاقيه يبعد عني اللي مخوفني .. بحس انه سبحانه اماني وحمايتي

لما ابقى عاوزة اشتكيله من حد ولا من حاجة واطمن لما ابكي وانا حاسة انه معايا .. واحس براحة في قلبي
وكاني شربت كباية مية ساقعة بردت صدري ..

لما احس انه واحشني قوي لاني بقالي كم صلاة ماحسيتش بخشوع ماحسيتش اني بكمه من قلبي
لما احس ان ساعة الاذان ياه ربنا بينادي عليا .. انا عاوزة اروحله واعطر العباية والسجادة
ياه دا انا رايحة اقابل ربنا ... تخيلي دا ربنا بيطلبك عشان تقابليه وتكلميه ...

لما احس اني مابشبعش من القران .. وكل ايه احس انها احلى من اللي قبلها
وعاوزة اتعلم فيه كل حكم واقرا تفسير كل ايه ... لما تبهرني بلاغة كل كلمة ...
لما افتح سيرة الرسول عليه الصلاة والسلام واقرا احاديثه .. واحس اني عايشة معاه وشايفاه وحاسة بكلامه
لما اقرا عن سماحة الدين ويسره .. اقول ياالله هو في في الدنيا دين اجمل من كدا .. في رحمة كدا .. وتيسير كدا .. سبحان الله ...

بصو ياسادة ياكرام .. طبعا رمضان قرب وكلنا طبعا بنبقى عاوزين نعمل كل حاجة في رمضان
واحيانا بنتعب ومش بنقدر نكمل ولما بيخلص الشهر للاسف بنرجع زي الاول ونبطل لاننا مش متعودين طول السنة على العبادة المكثفة ...

طيب ايه رايكم .. اننا نبدا نقرا قران من بكرة اللي هيكون موافق 29 من شهر جمادى الاخرة
يعني باقي شهرين على رمضان ...
هنحاول نختم القران قبل رمضان لكن تبقى قراءة بتدبر لان الوقت قدامنا كبير .. وكل اية تاثر فيك
او تعجبك لغويا او تلاقي فيها حكم او يعجبك تفسيرها سجلها في كشكول وخليه اسمه مقتطفات وخواطر قرانية ..

وكمان هنا في الموضوع دا هنقول كلنا وصلنا لفين ... وكل واحد هيسجل الايات اللي اعجبته ويكتب تحتها اي حاجة .. وممكن يكتب حتى خواطره اللي حس بيها ساعة ماقرا الاية ...

وعلى فكرة ممكن في الاول ماتحسش بحاجة بس كل ماحاولت تركز وتتعمق هتبدا تحس شوية بشوية
وكل حسيت بالايات هتبدا تحس بحلاوة الايمان وكل ماحسيت بكدة هتبدا تحس بالقرب من ربنا ومن هنا
تبدا سلسلة من السعادة والجمال في حياتك مالهاش مثيل ...

ومفتاح السعادة واول خطوة ليها هو القران ... كلام ربنا سبحانه وتعالى ..

تحيتي

» كيــــــــــــــــــف تتغلب على العطش في رمضان ؟؟؟؟؟؟؟؟
» هيفاء وهبى تبدأ تصوير فوزاير رمضان...